Молитвослов

Канон о самовольне живот свой скончавших

(читается келейно и с благословения духовника)*

Глас 2-й

Песнь 1

Ирмос: Во глубине постла иногда фараонитское всевоинство преоруженная сила; воплощшееся же Слово всезлобный грех потребило есть: препрославленный Господь, славно бо прославися.

Упокой, Господи, душу усопшаго раба Твоего.

Всемилостивый Господи, помилуй мя по милости Твоей, пети Тебе начинающа и молитися о убившемся дерзко, да не в суд ми сие будет, ни в осуждение, Судие Праведнейший.

Упокой, Господи, душу усопшаго раба Твоего.

Да не будет молитва моя во грех, яко кроткий Давид глаголет: ниже во отягощение души самовольней смерти предавшемуся; но мученик мольбами оставление прегрешений наших даруй нам.

Слава Отцу и Сыну и Святому Духу.

Богатую милость присно всем источая, Всеблагий Христе Боже, и ныне рабу Твоему (имярек), нами Тебе молящемуся, помилование даруй и с преставльшимися во благочестии причти, аще и нечестиво скончался в неразумии.

И ныне и присно и во веки веков. Аминь.

Утвердивши колеблемый ум мой, Мати Божия, укрепи мя Божественными повеленьми Рождшагося из Твоего освященного чрева и упразднившего, Владычице, адово мрачное царство, со дерзновением неосужденно молитися об усопшем (имярек).
 

Песнь 3

Ирмос: На камени мя веры утвердив, разширил еси уста моя на враги моя: возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.

Упокой, Господи, душу усопшаго раба Твоего.

Твоея красоты сиянием озаритися усопшему благоволи, в вере с почившими, богатый в милости; Ты бо еси Бог наш Единый безгрешный и многомилостивый.

Упокой, Господи, душу усопшаго раба Твоего.

На месте прохлаждения в вечнем покоище сподоби прияти и раба Твоего, малодушие жизнь свою пресекшаго: Ты бо еси Един Сильный и немощи наша на Ся восприявый, Господи Боже наш.

Слава Отцу и Сыну и Святому Духу.

В чертозе небеснем водворитися, Владыко, приими раба Твоего (имярек), да не услышит он праведнаго Твоего гласа: "не вем тя", аще и воистину повинен есть сему.

И ныне и присно и во веки веков. Аминь.

Умерщвленных нас воздвигла еси, Богородице, жизни нетленней Жизнодавца рождши; и раба Твоего (имярек) возведи из ада преисподнейшаго, Сына Твоего о милости умоляющи.
 

Песнь 4

Ирмос: Пою Тя, слухом бо. Господа услышах и ужасохся: до мене бо идеши, мене ища заблуждшаго. Тем многое Твое снизхождение, еже на мя, прославляю, Многомилостиве.

Упокой, Господи, душу усопшаго раба Твоего.

Во уповании на Тя, Боже, изнемогшего, и насилием вражиим одоленнаго, раба Твоего пощади, Спасе презирая, яко Благ, прегрешения его вольная и невольная.

Упокой, Господи, душу усопшаго раба Твоего.

Милосердия имый неизследимую бездну, Господи, бездну греховную раба Твоего покрый, Человеколюбче, - омыв Кровию Своею грех неведения и маловерия его.

Слава Отцу и Сыну и Святому Духу.

Живыми господствуя и мертвыми владычествуя, помилуй и раба Твоего (имярек), власть бо имаши всякую на небеси и на земли, Христе Боже, Отцу соседый и Духом вся очищаяй.

И ныне и присно и во веки веков. Аминь.

Исцелила еси, Богородительнице, Евино поползновение окаянное; Зиждителя бо родила еси, исправити могущаго тварь погибающую: Того моли и сего раба (имярек) неключимаго, заповедь Божию преступившего, спасти по единой милости.
 

Песнь 5

Ирмос: Света подателю и веков Творче, Господи, во свете Твоих повелений настави нас: разве бо Тебе иного Бога не знаем.

Упокой, Господи, душу усопшаго раба Твоего.

Умертвишася и во дно адово поползнувшагося возведи, Боже, преступление того заглаждая; на Кресте бо грехи наша пришел еси омыти честною Кровию Своею, Христе, Искупителю всяческих.

Упокой, Господи, душу усопшаго раба Твоего.

Спасти нас пришедый, Христе Боже, приими ныне и наша недостойная моления о рабе Твоем (имярек), да муки вечныя избавиши, помилован будет с нами, Спасителю Преблагий.

Слава Отцу и Сыну и Святому Духу.

Молим Тя, Слове Божий, аще и дерзновенно сие, прогнева бо Тя раб Твой (имярек), обаче благодатию Твоею умоляем, не возгнушайся молитв наших и помилуй нас, вкупе вси бо повинны есмы пред Тобою, Всесвятый Владыко.

И ныне и присно и во веки веков. Аминь.

Под кровом Твоим, Мати Божия, спасаются вси надеющийся на Тя: Твоим заступлением защити и нас, и сподоби со дерзновением неосужденно молити Сына Твоего о живот свой скончавших безнадежно (имярек).
 

Песнь 6

Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.

Упокой, Господи, душу усопшаго раба Твоего.

Из земли создавши человека, Боже, и в землю ныне возвратишася, пощади, Господи, в неразумии сокрушившаго скудельный сосуд свой: можеши бо, Владыко Творче, и паки возставити его от истления.

Упокой, Господи, душу усопшаго раба Твоего.

Неизреченный и непостижимый, Господи, щедротами несказаннаго Человеколюбия Твоего помилуй живот свой скончавшаго, презирая согрешения его, яже в ведении и неведении содеянная.

Слава Отцу и Сыну и Святому Духу.

Озаритися милостию Твоею сподоби, Владыко, вольне оставльшаго (имярек) житие свое и к свету Твоему возведи, из тьмы несветимыя изымая, милосердия ради.

И ныне и присно и во веки веков. Аминь.

Избавительнице, усердно призывающим Тя, Пречистая Владычице, Сына Твоего умоли скончавшагося (имярек) ущедрити: живота и смерти Владыку родила еси.
 

Песнь 7

Ирмос: Богопротивное веление беззаконнующаго мучителя высок пламень вознесло есть; Христос же простре благочестивым отроком росу духовную: Сый благословен и препрославлен.

Упокой, Господи, душу усопшаго раба Твоего.

Во ад с душею, яко Бог, сошедый, и в рай разбойника с Собою введый, помяни и ныне раба Твоего (имярек), преступлением многим Тя прогневавша, ныне же Тебе нами молящася бедне.

Упокой, Господи, душу усопшаго раба Твоего.

Един безгрешный, в мертвых волею вменился еси, да умерщвленных силою человекоубийцы воскресивши с Собою, от державы того исхити и раба Твоего, Всесильне.

Слава Отцу и Сыну и Святому Духу.

Радость присносущную даровати нам Воскресением Своим изволивый, от мрачнаго горькаго царства изми раба Твоего (имярек), да от муки вечныя свободившися, узрит себе одесную Тебе, Судие Многомилостивый.

И ныне и присно и во веки веков. Аминь.

Сияние славы Отчей, плотию от Тебе явившегося умоли, Пресвятая, из адовы мглы свободити непотребнаго раба Твоего (имярек), той бо яко Матерь, Тебе нами просит.
 

Песнь 8

Ирмос: Пещь иногда огненная в Вавилоне действа разделяше, Божиим велением халдеи опаляющая, верныя же орошающая, поющия: Благословите, вся дела Господня, Господа.

Упокой, Господи, душу усопшаго раба Твоего.

Смертное царство Своею смертию разоривый, Божественною же силою вход в вечный живот отверзый, не затвори благоутробия Твоего и рабу Твоему, аще и прегрешившему, обаче из ада ныне горце взывающа.

Упокой, Господи, душу усопшаго раба Твоего.

Красоты Твоея насладитися сподоби, студ греха безобразнаго очищая умершаго смертию поносной: Един бо еси, Владыко, греха свободен, крестною смертию за нас умертвился еси.

Слава Отцу и Сыну и Святому Духу.

Исправити хотя падших в персть смертную, Сам смерти причастен явился еси, Безсмертный, от смертных удолий силою Твоею возведи раба Твоего (имярек), лютою смертию поползнувшагося.

И ныне и присно и во веки веков. Аминь.

Велия воистину есть Рождества Твоего тайна, Богомати: Бога воплотившагося родила еси; Его же моли, яко Сына Твоего, спасти бедне скончавшагося (имярек): имаши бо дерзновение к Рождшемуся от Тебя Благоутробному Спасу мира.
 

Песнь 9

Ирмос: Яже прежде солнца Светильника Бога возсиявшаго, плотски к нам пришедшаго, из боку девичу неизреченно воплотившая, Благословенная, Всечистая, Тя, Богородице, величаем.

Упокой, Господи, душу усопшаго раба Твоего.

Имеяй власть живых и мертвых, пощади, Спасе, раба Твоего (имярек), смертию горькою скончавшагося: Тебе бо от Отца Твоего дадеся живити и миловати, ихже хощеши, Сыне Божий.

Упокой, Господи, душу усопшаго раба Твоего.

Преславное множество святых Твоих, Христе, непрестанно молит Тя за грешныя рабы Твоя, да помилуеши ихже волиши милосердием Твоим и геенны вечныя избавиши.

Слава Отцу и Сыну и Святому Духу.

Благости воистину пучина неизследимая, благодатию Твоею помилуй прогневавшаго Тя раба Твоего (имярек), и нас молящихся.

И ныне и присно и во веки веков. Аминь.

Достойно Тя, Богородице, ублажающе, к Тебе, яко Матери нашей, притекаем надежно; сами себе и брата нашего (имярек), малодушие скончавшагося, Тебе Заступнице и с Тобою Христу Богу предаем смиренно.

Молитва преподобного Льва Оптинского для келейного чтения

Взыщи, Господи, погибшую душу раба Твоего (имярек): аще возможно есть, помилуй. Неизследимы судьбы Твои. Не постави мне в грех молитвы сей моей, но да будет святая воля Твоя.

* Печатается по изданию Свято-Успенского Псково-Печерского монастыря, 1993.